Әл-Фараби атындағы ҚазҰУ-да Түлектер күні 2011 жылдан бастап аталып келеді, әрі бұл биология және биотехнология факультетінің молекулалық биология және генетика кафедрасының көптеген түлектері үшін дәстүрге айналған.

Биыл Қазақ ұлттық университетінің және молекулалық биология және генетика кафедрасының Түлектер күніне орай ұйымдастырылған мерекелік іс-шаралар әл-Фарабидің 1150 жылдығына арналған және 30 мамырда online режимінде өтеді.

Бүкіл әлемді дүр сілкіндірген ковид-19 пандемиясына байланысты туындаған алуан түрлі мәселелерге қарамастан, кафедраның әр жылдардағы түлектері бұл айтулы күнді - Түлектер күнін ұмытпай, Alma mater –ге өздерінің құттықтаулары мен тілектерін жолдауда:

 Койшыбаева Зоя Кашкинбаевна:

«Мен әл-Фараби атындағы Қазақ Ұлттық университетінің биология факультеті молекулалық биология және генетика кафедрасының 2003 жылғы түлегімін. Қазақстандағы тұңғыш университет қабырғасында терең білім алып, оны әрі қарай тәжірибеде шыңдау мақсатында білім беру саласында жұмыс жасап келемін. Тынымсыз еңбектің арқасында Қазақстан Республикасының үздік ұстазы, білім саласының құрметті қызметкері секілді жетістіктерге жеттім. Қазіргі таңда Алматы қаласында орналасқан, үздік білім беру мекемелерінің бірі, номері 44-ші мектеп-гимназияның директоры болып жұмыс атқарамын.

Осындай нәтижелі жұмысқа жетуімнің басты себебшісі бізге тәлім берген оқытушылардың еңбегі деп білемін.

Осы орайда молекулалық биология және генетика кафедрасының меңгерушісі Жунусбаева Жазира Кабуловна мен барлық оқытушылар қауымына алғысымды білдіргім келеді. Сонымен қатар, маған табандылық пен қажырлы еңбек етуді үйреткен, ерінбей үздіксіз білім алуға тәрбиелеген, менің ғылыми жетекшім болған, биология ғылымдарының докторы, өз ісінің білгірі Бисенбаев Амангелді Қуанбайұлын ерекше атап өткім келеді. Сіздерден алған тәлімімнің арқасында шәкірттерімді ғылымға баулып, осы күнге дейін өзім оқыған білім ордасымен байланысымды үзбей, үнемі тығыз қарым-қатынаста жұмыс жасап келемін.

Сіздердің берген білімдеріңіз, бізге көрсеткен жолдарыңыз бен айтқан ақылдарыңыз үшін рахметімді айтқым келеді.

Құрметті әріптестер! Сөзімнің соңында барлықтарыңызды Бітірушілер күнімен құттықтаймын!»

Рыспекова Айман Бокеновна:

«Қайырлы күн! Әл-Фараби атындағы Қазақ ұлттық университетінің оқытушылар қауымы және түлектері!

Сіздерді түлектер күнімен шын жүректен құттықтаймын. Сіздерге дендеріңізге саулық, еңбектеріңе мол табыс тілеймін. Мен осы аталған университеттің биология және биотехнология факультетінің молекулалық биология және генетика кафедрасының 2005 жылғы түлегімін. Университет қабырғасында алған терең білімімнің нәтижесінде Өсімдіктер физиологиясы және биотехнолониясы институтының аспирантурасына қабылданып, кандидаттық диссертациямды академик Палымбетова Фатима Абылқайырқызы мен молекулалық биология және генетика кафедрасының профессоры Айташева Зауре Гаинетдинқызының жетекшілігімен қорғап, «Болашақ» бағдарламасымен Амераика Құрама Штаттарында молекулалық генетика саласы бойынша ғылыми тағылымдамадан өттім. Қазіргі уақытта Нұрсұлтан қаласындағы С.Сейфуллин атындағы Қазақ агротехникалық университеті агрономия факультетінің егіншілік және өсімдік шаруашылығы кафедрасының қауымдастырылған профессоры қызметінде еңбек етудемін. Сонымен қатар, гранттық қаржыландыру бағдарламасы бойынша ғылыми жобалармен зерттеу жұмыстарын жүргізудемін.

Осы жеткен жетістіктерімнің барлығы үшін, бізге аянбай білім берген, білікті маман ретінде қалыптасуымызға зор үлесін қосқан университеттің, соның ішінде молекулалық биология және генетика кафедрасының профессорлық-оқытушылар қауымына үлкен алғысымды білдіремін».

 Отарбаев Марат Калдыбаевич:

«Құрметті түлектер! Сіздерді бәрімізге ортақ мереке - әл-Фараби атындағы Қазақ ұлттық университетінің Түлектер күнімен құттықтаймын!

Мен біздің университетіміздің биология және биотехнология факультетінің, молекулалық биология және генетика, биоалуантүрлілік және биоресурстар кафедрасының түлегімін. Бүгінде мен университетіміздің түлектерінің бірі Байкошкарова Салтанат Берденқызы құрған Қазақстандағы алғашқы «Экомед» экстракорпоралді ұрықтандыру орталығының директорымын. Біз өзіміздің университеттегі студенттік шақтарды үлкен ризашылықпен, күлімсірей еске аламыз. Біздің біліктілігі жоғары мамандар боуымызға орасан зор еңбек сіңірген барлық оқытушыларға үлкен алғысымызды білдіреміз. Осы орайда мен Шалахметова Тамара Минажевнаны, Бисенбаев Амангелді Қуанбайұлын, Саугабаев Қаламқас Магзамқызын ерекше атап өткім келеді». 

Токубаева Анар Адильхановна:

«Мен, биология ғылымдарының РhD докторымын. Мен де қазақ ұлттық университетінің молекулалық биология және генетика кафедрасының түлегі болып табыламын, қазіргі таңда экстракорпоралді ұрықтандыру лабораториясының эмбриолог-генетигі болып қызмет атқарамын.

Мен молекулалық биология және генетика кафедрасының профессорлық-оқытушылық ұжымын Түлектер күнімен шын жүректен құттықтай отырып, алғысымды білдіремін, оның ішінде Шүлембаева Күлзия Қонысбаевна мен Айташева Зауре Гайнетдиновналарға алғысым шексіз».

Рахметова Нуржамал Ғалымжанқызы:

«Мен молекулалық биология және генетика кафедрасының түлегімін, қазіргі таңда экстракорпоралді ұрықтандыру лабораториясының эмбриологы баолып жұмыс атқарамын.

Мен де оқытушым Калимагамбетов Айтқали Мажитұлына, ғылыми жетекшім Бекманов Бақытжан Орақбайұлына үлкен алғысымды білдіргім келеді. Сіздерге үлкен рахмет. Баршаңызды Түлектер күнімен құттықтаймын».

  Айбек Мурсалимов:

«Мен әл-Фараби атындағы Қазақ ұлттық университетіндегі биология және биотехнология факультетінің молекулалық биология және генетика кафедрасының 2012 жылғы бакалавр, 2014 жылғы магистр түлегімін. Бүгінгі күнге орай, барлық түлектерді осы мерекемен шын жүректен құттықтаймын. Сондай-ақ барлық ұстаздарыма, кафедраға, өзім білім алған молекулалық генетика лабороториясына, әсіресе ғылыми жетекшілерім Амангелді Куанбаевич пен Назгүл Абдуллаевнаға үлкен рахметімді, алғысымды білдіргім келеді.

Қазақ ұлттық университетінің қабырғасында академиялық мобилділік бағдарламасы бойынша Германияның Штуртгарт қаласындағы Хоэнхайм университетінде білімімді жетілдіруге мүмкіндік алдым. Университет бітіргеннен кейін Назарбаев университетінде, Францияның Густав Росси клиникасымен бірлесіп геном тұрақтылығы және ДНҚ репарациясы саласында біраз зерттеу жұмыстарын жүргіздім. Қазіргі кезде өз білімімді жалғастыру үшін Америка Құрама Штаттарының Аризона штатының университетінде доктарантурамды жалғастырудамын. Клеткалық биология саласында. Бұйыртса, осы алған білімдерімді, ҚазҰУ-дан, осы жерден алған білімімді шыңдап Қазақстанның болашағын дамытуға өз үлесімізді қосамыз деп үміттенемін».

Асқарбаева Балжан:

«Мен әл-Фараби атындағы Қазақ ұлттық университетінің биология және биотехнология факультеті молекулалық биология және генетика кафедрасының 2003 жылғы түлегімін. Университет қабырғасында алған біліміммен әрі қарай жаңа биіктерді бағындыру мақсатында Чехия мемлекетінің Оңтүстік Чех университетінде докторантураның 3-курсында оқуымды жалғыстырудамын. Ал соның шырағы болған, жол бастаушы болған кафедрама, университетіме алғысымды білдіргім келеді. Барлық білім берген оқытушы-профессор құрамына алғыс айта отырып, ғылыми жетекшілерім биология ғылымдарының кандидаты Жунусбаева Жазира Кабуловна мен профессор Омирбекова Наргүл Жаппаровналарға алғысым шексіз. Сөзімнің соңында барлық түлектерді Әл-Фарабидің 1150 жылдығына арналған Түлектер күнімен құттықтаймын! Тәуелсіз еліміздің гүлденіп, өсіп өнуіне лайықты қызмет ету жолында баршаңызға зор денсаулық, мол табыстар тілеймін».

Куанбай Айгерим:

«Мен әл-Фараби атындағы Қазақ ұлттық университетінің биология және биотехнология, молекулалық биология және генетика кафедрасының 3 курс докторантымын. 2018 жылы мен «Абай Верн» грантының иегері атандым. Соған байланысты мен Париж-Сакле университетінде Қазақстан мен Франция арасындағы қос келісім бойынша оқуымды жалғастырудамын. Мен ғылыми жұмысымды Густав Росси институтында геномдық интеграция және канцерогенез зертханасында доктор Мұрат Сапарбаевтың басшылығымен өсімдіктер мен жануарлардың геномдық тұрақтылығы және ДНҚ репарациясы мәселелері бойынша ДНҚ репарациясы тобында зерттеумен айналысып жүрмін.

Қазақ ұлттық университеті маған өзімнің алған білімімді ғылым жлында жүзеге асыруға мүмкіндік берді. Молекулалық биология және генетика кафедрасының барлық оқытушыларына, әсіресе ғылыми жетекшім профессор және академик Биесбаев Амангелді Қуанбайұлына алғысымды білдіргім келеді. Біздің Alma Mater түлектерінің барлығын Түлектер күнімен құттықтаймын!».

 Үміт Әлиасқарова:

«Мен әл-Фараби атындағы Қазақ ұлттық университетінің биология және биотехнология факультетінің молекулалық биология және генетика кафедрасының 2017 жылғы магистр түлегі болып табыламын. 28 мамырда Қазақ ұлттық университетінің қабырғасында Түлектер күні аталып өтеді және осыған орай мен өзімнің білім алған кафедраның оқытушылары мен профессорлық ұжымына, әсіресе өзімнің ғылыми жетекшім Бисенбаев Амангелді Қуанбайұлы мен Сабира Мықтыбекқызына үлкен алғысымды білдіремін.

Қазақ ұлттық университетінің қабырғасында білім ала отырып, мен Республикалық физика-математика мектебінде биология пәнін ағылшын тілінде оқыту және өзімнің дипломдық жұмысымды лабораториялық жағдайда жүргізу арқылы үлкен тәжірибе жинадым. Сонымен қатар Голландияның Утрехт қаласындағы Утрехт университетінде гендік терапия бойынша жаздық мектепке қатыстым, және өзімнің кафедрамның ұстаздарының ұсынысы бойынша мен магистратураның екінші жылын Париж-Сакле университетінде оқып шықтым. Бұл «Абай-Верн» стипендиялық программасының аясында жүзеге асты. Осы кезеңде мен Густав Росси онкологиялық институтында 6 ай тәжірибе жасап, соңында, осы жерде Франция мемлекетінің грантын ұтып алдым. Қазіргі таңда, үш жылдық докторант келісім-шартына қол қойып, Paris-Sud университетінің медицина факультетінде онкологиялық бағытта зерттеу жұмыстарын жүргізудемін. Қазіргі таңда ДНҚ-репарациясымен айналысып жүрмін».

Темирхан Аюпов:

«Мен әл-Фараби атындағы Қазақ ұлттық университетінің түлегімін. 2018 жылы биология және биотехнология факультетін бітірдім. Қазіргі уақытта мен Оксфорд университетінде магистрлік зерттеуімді жүргізіп жатырмын.

Үлкен ғылым әлеміне жол ашуға көмектескен білімі мен тәжірибесі үшін кафедраның барлық оқытушылар құрамына және жетекшім Бисенбаев Амангелді Қуанбайұлына алғысымды білдіремін».

 Биоалуантүрлілік және биоресурстар кафедрасы Сіздерді 2020 жылы 30 мамыр күні сағат 12.00-де әл-Фарабидің 1150 жылдығына арналған дәстүрлі ҚазҰУ түлектерінің Форумына шақырады.

Кездесу онлайн режимде Zoom бағдарламасын қолдану арқылы өткізіледі.

Өтілетін күні 30 мамыр 2020 жыл.

Басталуы сағат 12:00.

Іс – шара ZOOM платформасынюда өткізіледі.

Конференция идентификаторы 551 893 5241

Пароль 1234

Байланыс телефоны: +7 771 409 3809

Биоалуантүрлілік және биоресурстар кафедрасы 

www.kaznu.kz

Шалахметова Тамара Минажовна биология ғылымдарының докторы, профессор. 1970 жылы С.М.Киров атындағы Қазақ Мемлекеттік университетінің биология факултетіне түсіп, 1975 жылғы түлегі.

1981 жылы ҒА СССР цитология институтының диссертациялық кеңесінде «Цитология» мамандығы бойынша биология ғылымдарының кандидаты ғылыми дәрежесін алуға арналған диссертациясын қорғады.

1981 жылдан 1989 жылға дейін – ҚазССР (Алма-Ата қ.) ДМ ҚазҒЗИ кардиология бөлімінде ғылыми қызметкер болып жұмыс атқарды. 1985 жылдан бастап Қазақ мемлекеттік университетінің цитология және гистология кафедрасында аға оқытушы болып жұмыс істеді.

1989 жылы ол сол кафедраның доценті және МЕМ биотехнология және биология мәселелері ҒЗИ (1993-1998ж) аралығында басшы орынбасары қызметінде, МЕМ экология мәселелері ҒЗИ директор қызметін (2000-2008 ж)атқарды.

1995-1998 жылдары докторантурада оқыды, 1999 жылы «Гистология, эмбриология, клеткалық биология» мамандығы бойынша биология ғылымдарының докторы ғылыми дәрежесін иеленді.

2001 жылы биология ғылымы аясында профессор атағын алды.

2008-2015 жылдар аралығында әл-Фараби атындағы Қазақ ұлттық университетінің биология және биотехнология факультетінің деканы болып тағайындалды.

2015 жылдан бастап қазіргі уақытқа дейін биоалуантүрлілік және биоресурстар кафедрасының құрметті профессоры болып табылады.

350-ден астам ғылыми еңбектерде жарияланды, оның ішінде Scopus және Web of Science мәліметтер базасына кіретін жоғары рейтингті журналдарда мақалалар, монография, ҚР өнертабысқа авторлық куәліктер, патенттерге ие.

Кадрлар даярлауда белсенді қатысты, оның жетекшілігімен 12 ғылым кандидаты мен PhD қорғалған.

2000 жылдан 2010 жылға дейін үш мамандық бойынша докторлық диссертациялық кеңестің төрағасы болды және қазіргі уақытта PhD дәрежесін алу үшін диссертацияны қорғау жөніндегі кеңестің мүшесі болып табылады.

Қазақстан Республикасы Білім және ғылым министрлігінің екі төсбелгісімен, «әл-Фараби атында ҚазҰУ дамуына қосқан айрықша үлесі» күміс медалімен марапатталған, Қазақстан Республикасының ғылымы мен техникасының дамуына елеулі үлес қосқан ғалымдар мен мамандарға мемлекеттік ғылыми стипендиясымен марапатталған (2005-2006; 2018-2019 жж.). және «Университеттің үздік оқытушысы» марапатының иегері (2010).  

Шалахметова Тамара Минажовнаның өзі білім алған оқу ордасына үлкен маххабатпен 45жыл бойы талмай қызмет етуі өз ісінің үздік шебері әрі кәсіби маманы мен қайталанбас көшбасшысы және білікті ұйымдастырушы екендігін дәлелдей түсуде.

Ұстазымыз, әріптесіміз: Шалахметова Тамара Минажовнаны дәстүрлі түлектер күнімен құттықтап, зор денсаулық, толағай табыс пен бақыт тілейді!

Биоалуантүрлілік және биоресурстар кафедрасы 

www.kaznu.kz

Есік қаласында орналасқан "MG" ЖШС @almaty_fish.kz индустриалды форель шаруашылығына экскурсия. Бұл шаруашылық айналымдарды дамыта отырып, жылдам қарқынмен өсуде және форель өсіру бойынша модельді, үлгілі шаруашылық болуы мүмкін, өйткені мұнда осы патша балығын өсіру үшін барлық ең жақсы жағдайлар жасалған, су температурасы, оттегі режимі, жоғары сапалы форель жемдері және шаруашылық қызметкерлері тарапынан тәулік бойы күтімді жасау. Әрине, кез келген табысты өндірістің артында табысты кәсіпкер-біздің түлек Марлен тұр. 

Ол әрдайым: "Аквамәдениетпен айналысу-бұл біздің болашағымыз, сондықтан кадрларды дайындау аса маңызды" деп айтады. Позитивті, жігерлі, ынталы, барлық жаңалықтарды жақсы көреді, ал ең бастысы өз мамандығына адал Марлен-өзі барлық түлектер үшін тамаша үлгі болып табылады! Бұл жерде Марленге оның тікелей қатысқандығы үшін, сирек кездесетін, қазіргі «балық шаруашылығы» трендті мамандығына немқұрайлы қарамағаны үшін алғыс білдіргім келеді және оған үлкен кемеде ұзақ жүзуге тілек білдіргім келеді. Аталмыш пост әл-Фараби атындағы ҚазҰУ-дың түлектері күніне арналады.

Биоалуантүрлілік және биоресурстар кафедрасы 

www.kaznu.kz

Мамилов Надир Шамилевич биология ғылымдарының кандидаты, қауымдастырылған профессор, биоалуантүрлілік және биоресурстар кафедрасының доценті. әл-Фараби атындағы ҚазҰУнің 1990жылғы түлегі.

1996 жылы ҚР БҒМ ҒК Зоология институтында кандидаттық диссертациясын қорғады. ҚазҰУ-да жұмыс істеу. Әл-Фараби 1990 жылдан бастап зоология және ихтиология кафедрасында аға лаборант болып бастады.

2017жылы биология саласында қауымдастырылған профессор (доцент) атағын алды.

1990 жылдан 1999 жылға дейін проф. В.П. Митрофановтың жетекшілігімен жобалардың орындаушысы болды,

2003 жылдан 2017 жылға дейін ғылыми-зерттеу жобаларына қатысты.

Ғылыми зерттеулердің нәтижелері 100-ден астам ғылыми еңбектерде жарияланды, олардың ішінде Scopus және Web of Science базасына енгізілген журналдарда мақалалар, Scopus деректер базасына сәйкес h-index-2 монографиясы жарыққа шықты.

Доцент Мамилов Н.Ш. кадрларды дайындауға белсенді қатысады, оның жетекшілігімен биология ғылымдарының 3кандидаты қорғалды. Қоғамдық жұмысы: ЮНЕСКО "Адам және биосфера" бағдарламасының Қазақстандық комитетінің мүшесі (MAB), Орталық Азия балықтарының әртүрлілігін сақтау бойынша халықаралық табиғатты қорғау одағының (МСОП-IUCN) жұмыс тобының мүшесі.

"ЖОО үздік оқытушысы" атағымен марапатталды (2019 ж.).

Университетіміздің түлектерді дәстүрлі ресми түрде ұлықтау шарасы биыл қашықтықтан жүргізлуіне қарамастан ұжымыздың құрметті азаматы, оқытушысы, әріптесіміз:Мамилов Надир Шамилевичті түлектер күнімен құттықтаймыз!

Биоалуантүрлілік және биоресурстар кафедрасы 

www.kaznu.kz

Биология және биотехнология факультеті, Биоалуантүрлілік және биоресурстар кафедрасының 1 курс докторанты Джумаханова Г.Б. ұйымдастыруы, Биология мамандығының 2 курс студенттерінің қатысуымен ұлы ақын, композитор, философ, саясаткер, ағартушы Абай Құнанбайұлының 175 жылдық мерей тойын тойлауға арналған «Абай өлеңдері!» атты іс-шараны интернет желісінде эстафета түрінде өткізілді.   

Оқу іс-шарасының тақырыбын таңдау студенттерді қазақ ақыны, философ, композитор, ағартушы, ойшыл, қоғам қайраткері, қазақ жазба әдебиетінің негізін қалаушы және оның алғашқы классигі, ағартушылық негізінде орыс және еуропалық мәдениетке жақындау рухындағы мәдени реформатордың өмірімен және барлық қырларымен студенттерді таныстыру қажеттілігімен анықталады.

   Іс-шараға Биология мамандығының 2 курс студенттері ББ 18-05, ББ 18-06 топ студенттер мен куратор эдвайзері қатысты. Докторанттардан басқа 1 курс студенттері де белсенді қатысты. Іс-шарада Абай Құнанбайұлының өмірбаяны баяндалып, «Жаз», «Лето», «Summer»,  «Сегіз аяқ», «Сенбе жұртқа, тұрса да қанша мақтап», «Мен жазбаймын өлеңді ермек үшін», «Ғылым таппай мақтанба», «Нұрлы аспанға тырысып өскенсің сен», «Жігіттер ойын арзан күлкі қымбат» өлеңдері оқылып, Абай Құнанбайұлының ақындық өнері студенттер жүрегінде жаңғырды.

 Биоалуантүрлілік және биоресурстар кафедрасы

www.kaznu.kz

әл-Фараби атындағы Қазақ ұлттық университеті Биология және биотехнология факультетіне қарасты Биоалуантүрлілік және биоресурстар кафедрасының ұстазы, әріптесіміз, биология ғылымдарының кандидаты, доцент Есжанов Бірлікбай Есжанұлына 75-жылдық мерей торқалы тойымен құттықтаймыз!!!

Биоалуантүрлілік және биоресурстар кафедрасы

www.kaznu.kz

Педагогикалық тәжірибе жүргізу барысындағы тобымда бірыңғай бойларында инабаттылық пен ізеттілік тұнып тұрған қазақ қыздары болғандықтан тәрбиелік іс - шара тақырыбын «Көктем келер гүлін алып, жазда келер жырын алып» – деп ән мәтінінде айтылатындай, нұрлы шуағы мол наурыз айы туып, ардақты аналар мен ару қыздарымыздың төл мейрамы 8 – наурыз мерекесіне арнадық. Өмірімізге нұр берген, қуанышқа бөлеген нәзік жандыларды бұл күні құрметке бөлейміз, гүл мен сыйлық сыйлаймыз, жылы лебізімізді білдіреміз. Ботаника 15 кабинетін тәрбиелік іс – шараға сәйкес түрлі плакаттар, шарлар іліп әдеміледік. Құрылған сценарийіміз бойынша өлеңдер оқылып, әсем ән айтылып, ыстық лебіздер жолданды. Студенттердің бір-біріне даярлаған сыйлықтары табысталды. Ұйымдастырылған тәрбиелік іс-шараға келесі топтағы ІIІ курс студенттері, І курс магистранттары қатысты. Сонымен қатар тәрбие сағаты барысында белгілі режиссер А. Сатаевтың «Анаға апарар жол» атты қысқаметражды фильмі көрсетілді. «Анаға апарар жол» – ізгілікке, отаншылдыққа жетелейтін фильм. «Анаға апарар жол» – көптеген өмір сынақтарынан өткен адамның тағдыры туралы әңгімелейді. Барлық қиындықтарды жеңуге оған ана махаббаты күш береді. Кейіпкердің өмір жолы арқылы картинада қазақ халқының тарихи кезеңдері көрсетілгені анық байқалады. Ана махабаты адамға қанат бітіреді, күш береді рухтандырады.Тәрбие сағатының көздеген мақсаты – осы фильм арқылы өмірдегі қандай қиын жағдай болмасын шешімі бар екендігін түсіндіру, өмір сынақтарынан өте білуге бейімдеу болды.

Аға оқытушы Чилдибаева А.Ж., 1-курс магистранты Туралиева Г.

Биоалуантүрлілік және биоресурстар кафедрасы

www.kaznu.kz 

2020 жылдың 28 сәуірінде әл-Фараби атындағы ҚазҰУ-дың биология және биотехнология факультетінің молекулалық биология және генетика кафедрасында кафедра меңгерушісі Ж.К.Жүнісбаеваның басшылығымен ашық мәжіліс өтті. Мәжіліс Microsoft teams платформасында жүргізілді. Мәжіліске қашықтан кафедраның барлық куратор-эдвайзерлері және «Генетика», «Биология», «Биотехнология» мамандықтарының орыс және қазақ бөлімдерінің 1,2,3,4 курс студенттері мен магистранттары, шамамен 200-ден астам адам қатысты. Онда қашықтан оқыту технологияларын қолданып жазғы сессияны тапсыру мәселесі талқыланды.

Биыл жазғы сессияның барлық емтихандары, бүкіл әлемді дүр сілкіндірген коронавирус (COVID-19) пандемиясына байланысты жаппай карантин шараларының енгізілуіне қарамастан, академиялық күнтізбеге сай жүретіні айтылды. Яғни бакалавриат пен магистратураның 1-курстары үшін қорытынды бақылау емтихандары 11 мамыр мен 24 мамыр аралығында, бакалавриаттың жоғары курстары үшін 25 мамыр мен 14 маусым аралығында, қорытынды аттеатация мен дипломдық жобаларды қорғау 8 маусым мен 12 шілде аралығында өтетіні айтылды.  

Онлайн конференция қатысушылары, қорытынды емтихандардың қабылдану ережелерімен, қолданылатын қашықтан оқытудың СДО MOODLE (dl.kaznu.kz), Open KazNU (open.kaznu.kz), Open Master Class (omc.moocs.kz) платформаларымен, Қазақстанның ашық білім беру ұлттық платформасымен (moocs.kz) толық таныстырылды. Қорытынды емтихандардың: дәстүрлі жазбаша емтихан, жазбаша жобалар, тест формалары «Оқулық», «Мoodl», «Univer» жүйелерінде, ауызша емтихандар мен диплом жұмыстарын қорғаудың Zoom, Microsoft teams, Google Meet, Cisko WebEX және т.б. платформаларында жүргізілу тәртібі түсіндірілді.

Мәжіліс барысында оқытушылар мен студенттердің барлық сұрақтарына жауап берілді.

Ағымдағы жылдың 30 сәуірінде сағат 11.00-де Microsoft Teams платформасында биофизика және биомедицина кафедрасының ПОҚ онлайн режимінде жазғы емтихан сессиясын қашықтықтан өткізу мәселелері бойынша кездесу өткізеді.

www.kaznu.kz