ҚазҰУ-да Үндістан Республикасының 70 жылдығы мен үнді халқының рухани көшбасшысы Махатма Гандидің туғанына 150 жыл толуына арналған іс-шаралар өтуде. Олар еліміздің жетекші жоғары оқу орны мен Қазақстандағы Үндістан Елшілігімен бірлесе отырып өткізілуде.

Іс-шара «Үндістан күндері» атты Үнді мәдениеті мен әдебиеті фестивалінің ашылуынан басталды. ҚазҰУ-да Махатма Гандиді еске алу күні «Гандидің ойлары мен қанатты сөздері» атты кітаптың тұсаукесері өтті. Оны жарыққа шығарудың бастамашысы - ректор Ғалым Мұтанов болды. Бірегей кітап қазақ, орыс және ағылшын тілдерінде басып шығарылды.

Махатма Ганди кезінде «Әлемді өзгерткің келсе, – өзгерісті өзіңнен баста», – деп айтқан болатын. Ол өзінің жоғары гуманистің көзқарастағы өмірлік үлгісімен елі мен әлемді өзгертіп, қайсарлығы мен рух күші арқылы өз халқының жүрегіне әділдік пен қайырымдылыққа деген сенім ұялатып, жарқын болашаққа жол бастаған», – деп атап өтті ҚазҰУ ректоры Ғалым Мұтанов. 

Үндістан Республикасының Қазақстандағы Төтенше және Өкілетті Елшісі Прабхат Кумар өткізілген мерекелік шаралар үшін ҚазҰУ-ға шын жүректен алғысын білдірді. «Махатма Гандиді Үндістанда ғана емес, бүкіл әлемде құрметтейді. Оның адамгершілік пен қайырымдылыққа шақыруы бүгінгі күнге дейін өзекті болып отыр. Біз үшін кітаптың жарыққа шығуы аса маңызды оқиға және бұл біздің халықтарымыз арасындағы түсіністік пен рухани жақындасуына ықпал етеді. Үнді халқының ұлы өкілінің әдеби мұрасын зерттеу, әрине, қазақстандықтардың жас буынына аса пайдалы болады», - деп атап өтті Елші мырза.

Фестиваль Қазақстан мен Үндістан арасындағы нағыз мәдени көпірге айналды. Шығыстану факультетінің үнді бөлімінің студенттері ұлы Махатманың қанатты сөздерін оқып, көпшілікті оның өмір жолымен және шығармашылығымен таныстырды.

ҚазҰУ-да былтыр Махатма Гандидің үнді зерттеу орталығы ашылып, Қазақстан-Үнді ақпараттық технологиялар орталығы бірнеше жылдан бері табысты жұмыс істеуде. Университет студенттері мен оқытушылары академиялық алмасу бағдарламалары бойынша Үндістанның ЖОО-да тағылымдамадан өтіп, бірлескен ғылыми жобаларын жүргізуде. ҚазҰУ-ға Үндістан профессорлары дәріс оқу үшін шақырылады және Қазақстандық университетте жоғары білім алғысы келетін Үнді студенттерінің қатары жыл сайын өсуде.