Игі бастама үзілмеуі тиіс
Көрулер: 965
Журналистердің кәсіби мерекесіне де аз қалды. Жыл сайын маусымның соңғы аптасына келетін атаулы күнмен құттықтау үшін әл-Фараби атындағы Қазақ ұлттық университетінің журналистика факультеті ұжымы редакциямызға арнайы ат басын бұрды. Қара шаңырақтан түлеп ұшқан түлектеріне дайындаған марапаттары бар екен. Салтанатты жағдайда табыс етуге сый-сыяпаттарын қоса ала келіпті.
Еліміз бойынша маман даярлаудан Ұлттық университет көш бастайды. Талапкердің тілегі, алға қойған мақсаты, ойға алған арманы – көп жағдайда ҚазҰУ. Соның ішінде журналистика факультеті қабырғасында білім алғандардың басым бөлігі бүгінде – белгілі азаматтар. Бірі – мерзімді басылымның беделді тілшісі, бірі – телевизия майталманы, енді бірі – білікті басшы. Бәрін біріктіріп, бір арнаға тоғыстырған – ҚазҰУ. Осыны ескере отырып, журналистика факультетінің ұжымы «Біз түлектерімізбен мақтанамыз» атты акция бастады. Бастамаға сәйкес еліміздің түкпір-түкпірінде кәсіби мамандығы бойынша қызмет атқарып, көзге түсіп жүрген түлектерді факультет тарапынан марапаттау жоспарланып отыр.
Сағатбек МЕДЕУБЕКҰЛЫ, журналистика факультетінің деканы:
– «Біз түлектерімізбен мақтанамыз» акциясын ұйымдастыруды биылдан бастап қолға алдық. Ең алғаш болып еліміздегі ең беделді басылымдардың бірі, жас журналистердің арманындағы қызмет орнына айналған «Айқын» республикалық қоғамдық-саяси газетінен бастағанды жөн көріп отырмыз. Бұл жерде көптеген түлегіміз қызмет еткен, әлі де жұмыс істеп келеді. Ұстаздар үшін шәкіртінің кеңінен қанат жайып, шырқау биікке ұшқанын көруден артық бақыт жоқ! Біздің тараптан теория жүзінде берілген білімді сіздер тәжірибе арқылы шыңдайсыздар. «Айқын» газетінің ұстаханасынан өткен журналистердің осалы болмайды. Осылайша, екі араға даңғыл жол салып, бірлесіп жұмыс атқара берейік. Біз сіздер секілді түлектерімізбен, шын мәнісінде, мақтанамыз. Газет ұжымына табыс, денсаулық, шығармашылық шабыт тілейміз. Кәсіби мерекелеріңізбен құттықтаймыз!
Толықырақ: https://aikyn.kz/2017/06/14/16993.html