«Еуразиялық банк» АҚ басқармасының төрағасы Майкл Эгглтон және оның жұбайы Ребекка экономика саласы бойынша үш жылға білім алу үшін қазақстандық ЖОО-ның бес студентіне грант орындарын бөлмекші.

Грант орындарына бөлінетін 15000 АҚШ долларымен қоса, Эгглтон әулеті қазақстандық жоғары оқу орындарының кітапханаларын компьютермен жабдықтайтын болады. Олардың қатарында әл-Фараби атындағы Қазақ ұлттық университеті, КИМЭП, ҚБТУ, Л. Гумилев атындағы ЕҰУ және Халықаралық бизнес академиясы бар.

- Дағдарыстың салдарынан жастардың көбі оқу ақысын төлеуде қиналып жүр, - дейді Эгглтон мырза. - Сондай-ақ, Қазақстанның болашағы негізінен еңбек нарығын ЖОО-ның талантты түлектерімен толтыруына байланысты. Көрсетіп отырған көмегіміз білікті студенттердің сапалы білім алуына мүмкіндік береді деп үміттенеміз.

- Мұндай көмек өмірде сирек кездеседі, - деді әл-Фараби атындағы Қазақ ұлттық университетінің ректоры Бақытжан Жұмағұлов. - Демеушілердің ішінде жеке тұлғалардан гөрі арнайы ұйымдар көбірек кездеседі. Эгглтон әулетінің бұл ықыласын біз кеңпейілділікке жатқызамыз.

Материал Баспасөз қызметінің «Экспресс К» газетіндегі жарияланған мақала бойынша дайындалды