Кез-келген мемлекеттің әл-ауқаты мен тұрақты дамуы ұлттық адами капитал көрсеткіштеріне тәуелді және әлемдік экономика дамуының тенденциясы да уақыт өте келе осы тәуелділіктің тек одан әрі нығая түсетінін көрсетеді. Адами капиталдың сапасын арттыру мәселесін шешу білім беру жүйесіне, оның ішінде жоғары оқу орындарына тікелей байланысты. Өйткені, жоғары оқу орындарының басты мақсаты – өз Отанын дамыту жолында аянбай тер төгетін, білімді жастарды тәрбиелеу. Осындай білімді жастарымыз Қазақстандағы білім мен ғылымның қарашаңырағы – әл-Фараби атындағы Қазақ ұлттық университетінен жыл сайын түлеп ұшады.
Болашақтың кілтін ұстайтын жастарды білім нәрімен сусындатып, жаңа белестерге жетелейтін республикамыздағы ең үздік оқу орны – ақ басты Алатаудың бөктерінде орналасып, бейнебір мұқалмас білім шаңырағы, ұлылар мен ірілерді тәрбиелеп шыққан, ұлттық рухтың лебі есетін әл-Фараби атындағы Қазақ ұлттық университетінің құрылғанына биыл 85 жыл толып отыр.
Университет құрылғаннан бері еліміздің әлеуметтік-саяси өміріне және экономикасына аса зор үлес қосып келеді. Қазіргі таңда ҚазҰУ халықаралық ғылым және білім беру кеңістігінде өзінің лайықты орнын алып, жоғары білім саласындағы әлемдік көшбасшы университеттің біріне айналған. Оның дәлелі – университеттің әлемдегі 800 ең үздік университеттер арасында 220-орынға ие болуы. Бұл көрсеткіш – университетіміздің мерейі асқақ, тәлімі тұғырлы екенін айқындайтындай. Оған қоса, студенттердің білім алуына барынша жайлы жағдай жасалып, барлық ғимарат заманауи талаптарға сай, озық үлгідегі техникамен жабдықталғанын атап өткен жөн. Жыл сайын көптеген озат мектеп түлектері мен грант иегерлері білім жолын жалғастыру үшін бізді таңдауы да университетке деген жоғары сенімнің бірден-бір көрінісі деп білеміз.
Бүгінде талай жалындаған жас түлектің арманына айналған Қазақ ұлттық университеті – білім бұлағының қайнар көзі, сапалы тәлім беретін оқытушы мен саналы ұрпаққа үлгі болатын студенттердің қарашаңырағы, әрі ұлттық болмыстың дәрежесін асқақтатар оқу орны.
Университеттің 85 жылдық даму тарихында құрылғанына 70 жыл толып отырған, жоғары білімді, бәсекеге қабілетті мамандардың буынын қалыптастыратын Экономика және бизнес жоғары мектебінің алар орны ерекше. Экономика және бизнес жоғары мектебі экономика ғылымының дамуына үлес қосып келе жатқан білікті де білімді профессор-оқытушылар құрамы жұмыс істейтін университеттегі ірі факультеттердің бірі болып табылады.
Осы жоғары мектептегі өзінің қайталанбас ерекшелігі мен кәсіби мәртебесі жоғары, заман ағымына ілесіп, білікті әрі сұранысқа ие мамандық иелерін дайындайтын, құрамы ең үлкен кафедра Менеджмент және маркетинг кафедрасы. Кафедра асқан білім мен ғылымды өздеріне түйіп, студенттерге ыстық ықыласпен жеткізетін, санасына сіңіруге күш салып, ұлтжанды тұлға ретінде қалыптастыру жолында еңбек ететін профессор-оқытушылар құрамынан тұрады. Осы құрам студенттерді болашақ мамандықтарының нағыз иелері болуға жан-жақты дайындайды. Оның айғағы – кафедрадағы мамандықтар бойынша халықаралық, республикалық деңгейде өткізілетін олимпиадалар, әр түрлі дәрежедегі ғылыми конкурстар, конференциялар. Бұл байқаулар студенттерді ел болашағын айқындайтын көшбасшылар ретінде дайындауға мүмкіндік береді. Ендеше, болашақта ел тұтқасын ұстар жастарымыз білім алатын, дамудың даңғыл жолында қол жеткізген жетістіктері арқылы 85 жылдық тарихы бар университетіміздің алар асулары мен шығар биігі алда екендігі сөзсіз.
Р.ЕСЕНЖІГІТОВА,
әл-Фараби атындағы ҚазҰУ-дың
аға оқытушысы.