Кітап таныстырылымына ҚР Ұлттық Ғылым Академиясы Ш.Уәлиханов атындағы Тарих және этнология институтынан Нұрсан Әлімбай, Серік Әжіғали, Ахмет Тоқтабай, Әуезхан Шашаев, Гүлмира Орынбаева, Ә.Марғұлан атындағы Археология институтынан Ақан Оңғар, Ералы Ақынбек, Жанболат Утубаев, М.Әуезов атындағы Әдебиет және Өнер институтынан Гүлзия Пралиева, т.б. ғалымдар пікір білдірді. ҚР Жазушылар Одағы өкілдері, белгілі ақын жазушылар, Бақыт Беделхан, Бағдат Мүбәрәк, Ержан Алаштуған; ҚР Мемлекеттік Орталық музей директоры Рашида Харипова, «Қырым аралы» ғылыми-реставрация лабораториясының директоры Қырым Алтынбеков, Қазақстанның еңбек сіңірген қайраткері Естай Даубаев т.б. белгілі тұлғалар өз ойларын ортаға салды.

«Сыр-Арал этнографиясы» атты зерттеу еңбегінің таныстырылымында киіз үй тігу, киіз үйдің шаңырағын сәндеу мәдениетімен, суды пайдалану әдістері, соның ішінде құдық қазу және оның қабырғасын тас, кірпішпен қалау, сондай-ақ жүзгін, көкбұта, сексеуіл, тораңғымен шегендеу сияқты табиғатты игерумен байланысты қазақ халқының дәстүрлі білімдер жүйесінің аймақтық және жергілікті жерге тән ерекшелігімен таныстыратын көрме өтеді. Аймақты зерттеу барысында белсенді қолданыстағы құдықтар түрлерімен қатар, жойылу қаупі бар және шұғыл қорғауды қажет ететін кейбір қарауыл-құдық түрлері анықталды. Қызылқұм, Арал аймағында тұратын қазақтардың мал қора соғу, түйені таңбалау арқылы тіркеуге алу сияқты шаруашылық жүргізу қызметінің түрлері, сондай-ақ үй кәсіпшілігін жүргізуі және күнделікті өмір мен тұрмыстағы дәстүрлерді көрсететін фотосуреттер қойылды.